هو وهى مشيين على الكورنيش

هو وهى مشيين على الكورنيش .. الجو حار .. الشمس محرقة .

هي : عطشانة .
هو : وأنا كمان .
هي : يعنى ... عايزة اشرب!
هو : أكيد مادام عطشانة يبقى عايزة تشربي .
هي : المفروض – بما أن عندك إحساس يعنى – إني لما أقولك عطشانة تجيب لي حاجة ساقعة .
هو : ومين اللي هيحاسب ؟؟
هي : أنت طبعاً .
هو : منين ياحسرة .. ماانتى عارفة الكانز وغطاه .
هي : ماقلتش عايزة كانز .. كفاية إزازة صاروخ .
هو : طب لو هاتجيبى اعزمينى معاكى .
هي : يابنى أنت مابتحسش ، وبعدين بقالنا 3 ساعات ماشيين ، أنت مش ناوي تقعدنا ولا إيه؟
هو : عندك الكورنيش كله .. اختاري الرصيف اللي يعجبك .
هي : قصدي تعزمنى في مكان شاعري .
هو : في الحر ده .. ماينفعش .
هي : بلاش دى .. نأخد مركب عالكورنيش .
هو : المراكب بتغرق اليومين دول .. خلينا ع البر أحسن .
هي : بلاش المركب تعالى نأكل ترمس .. أظن ده رخيص .
هو : إنتى تضمني منين إن الراجل غاسل إيده وغاسل الترمس .
هي : أعوذ بالله .. إنت مقفلها كده ليه ؟؟
هو : بصراحة معييش فلوس .
هي :يا سلام!! .. ماأنت كان معاك إمبارح .

هو : إمبارح دخلت سينما مع بنت حلوة كده فالفلوس خلصت .
هي : بنت حلوه ؟؟!! وبتقولها في وشى .
هو : أكذب عليكى يعنى .
هي : لأ .. تحرق دمى أحسن .
هو : أنا مش شامم ريحه شياط يعني .
هي : يخرب بيت البرود .
هو : برود إيه ؟؟ ماهو الجو مولع أهو .
هي : إنت اللي بارد .
هو : بارد إزاى ؟؟ دا أنا بشُر عرق .
هي : بقولك إيه .. روحنى .
هو : أروحك ؟! هو إنتى ماتعرفيش تروحي لوحدك .
هي : آآآآه .. طب أنا ماشية .
هو : ليه يا حبيبتي؟؟
هي : حبك برص .
هو : والله برص بيفهم انه حبني.
هي : بجد كده كتير .
هو : كتير إيه ؟؟
هي : إرحمنى .. واضح إن الحر بيجى معاك بالعكس .. يا بارد .
هو : يعنى مصممة تمشى ؟؟
هي : أيوة وحالاً كمان .
هو : طب استني لما نوصل آخر الشارع .
هي : اشمعنى ؟؟
هو : أصل أنا ساكن هناك .. و مايرضكيش أروح لوحدى .
هي : لااااااااااااااااااااااااااااااااااااااااااااااااا ااااااااااااااا....اااا.اا.ا............
هو : ينفع كده ترمي نفسك في الميه مين هايوصلني بقى

زائر

بجد توبيك يجنن يا شمس
بس الولد ده رخم اوى انا لو منها اقتله ده مفيش خالص

mena ahmed كتب:: بجد توبيك يجنن يا شمس
بس الولد ده رخم اوى انا لو منها اقتله ده مفيش خالص

ههههههههههههه رخم بس هههههههههههههههه
والله انا لو فى مكانها اموت نفسي من اول كلمة ينطقها بالبرود اللى هو فيه ده

ثانكس يا منة على مشاركتك الجميلة دى والحمدلله ان التوبيك عجبك

التوبيك حلو قوى ياشمس

لا انا لو منها ارميه فى الميه دا بارد دا تلاجه فريزر بس

se7r_el3yon كتب:: التوبيك حلو قوى ياشمس

لا انا لو منها ارميه فى الميه دا بارد دا تلاجه فريزر بس

لا انا دمى بيتحرق بسرعة ممكن بعد ما ارميه القيه طلع ويقولى انا جييييييت ههههههههههه
فالواحد يموت نفسو احسن هههههههههههههههه

ثانكس يا سحر على مشاركتك الجميلة دى
نورتى التوبيك