حسى بقى بيا
حاسة انى بجد قربت خلاص اموت
وماعدش فاضل كلام ومكفينى السكوت
اسكت احسن ما يطلع صوت الأنين مكبوت
طيب انا لو هموت هرتاح
هوا اللى بيموت بيرتاح
ولا لو خيروه
ماكنش هيختار يموت
الدنيا طول عمرها مش راضية تهوانى
والا انا خاصمتها فراحت ماخصمانى
وليه بيهون عليها افضل كده اعانى
واغرق فىآهاتى وهمى واحزانى
ولا تلايميها وتاخدى بإيديا
انا من زمان عايشة وناقصنى حنية
يعنى تشوفينى بموت وفى ايدك الميه
انا بصراحة تعبت وعايزة ترضية
منك ومن غيرك
يالله بقى همى ورينى تأثيرك
اتغيرى شوية وراجعى كده نفسك
روحى اعملى نيو لوك ولونى رسمك
الوان جميلة بلاش الوانك الغامقة
يعنى كفايه سواد بجد مش طايقة
يالله بقى اتظبطى
وبطلى تغلطى
فى حق انسانة
عايزة فى مرة تنام
وهيا فرحانة
وهيا مرتاحة
مش سامعة تشويشك
وهيا شبعانة
وشاربة من زيرك
وواكلة من عيشك
لمى بقى ايدك
وجعنى طلطيشك
وكفايه تتبغددى
وتنفشى ريشك
عماله تدللى وتصيحى وتهللى
وفيا بتبهدلى وحبة تستندلى
حسى بقى بيا
وتطلعى فيا
هتلاقى كام دمعة
محفورة فى عنيا
هتلاقى كام كلمة فى حلقى محشورة
مش عارفه اطلعهم مش عارفة اكتبهم
مع انى قدامى طباشير وسبورة
مش عارفة اشاورلك
وانا ايدى مكسورة
مش عارفة اعبرلك وانا روحى مقهورة
بجد تعبانة ردى ياتاعبانا
هتقدرى فى مرة تخففى جروحى
وتمسحى دموعى
وطيبى روحى
وتحكيلى حكاية اسمعها قبل مانام
تكون كده جميلةو تنسينى الأيام
يالله قوليلى الحل اللى هيرضيكى
اسيبنى انا منك ولا احتمى فيكى
افضل اشيل همك ولا اشتيكى ليكى
اشخط فيكى شخطة ولا اداديكى
مش عارفة اقولك ايه مش
عارفة ارضيكى!
بس هاقولك شىء
لسة انا جامدة يعنى دى بس ظروف
وكل حاجة وارده
انا عندى ايمانى ورب يرعانى
وكل احلامى افضل كده صامده
يعنى تصاحبينى ولا هترمينى ومهما تورينى
هعيش فى حالة سلام
واعتبره كله علام
ولكل شىء فايده.
موضوع: حسى بقى بيا 
الأربعاء 21 يناير - 21:11